Президенттің тапсырмасы бойынша Үкімет неміс инвесторларымен бірлесіп Жетісу облысында халықаралық жүк-жолаушы әуежайын салады.
Премьер-Министр Олжас Бектенов SKYHANSA компаниясының директорлар кеңесінің мүшесі және тең құрылтайшысы доктор Кристин Грётцбахпен кездесу өткізді. Кездесу барысында Жетісу облысындағы «Хоргос» Халықаралық шекара маңы ынтымақтастық орталығы маңында жүк-жолаушы әуежайын салу жобасын іске асыру мәселелері талқыланды.
«Хоргос – Шығыс қақпасы» АЭА аумағында салынатын халықаралық жүк-жолаушы әуежайының жобасы ICAO халықаралық ұсынымдарына сәйкес авиациялық инфрақұрылымды дамытудың үш кезеңнен тұратын бағдарламасын көздейді. Бірінші кезең аясында 2027 жылға дейін мынадай нысандардың құрылысы жоспарланған:
сағатына 50 адамға дейін (2032 жылға қарай – 500 адамға дейін) өткізу қабілеті бар жолаушылар терминалы;
жылына 200 мың тоннаға дейін (2032 жылға қарай – 550 мың тоннаға дейін) JET A-1 жаңа үлгідегі авиаотынына арналған заманауи жанармай қоймасы;
жылына 50 мың тоннаға дейін (2032 жылға қарай – 250 мың тоннаға дейін) жүк өткізу қабілеті бар автотұрағы мен темір жол тұйығы бар жүк терминалы.
Екінші және үшінші кезеңдер аясында 2032 жылға дейін туристік және ойын-сауық инфрақұрылымын құру жоспарлануда. Жалпы инвестиция көлемі шамамен 250 миллиард теңгені құрайды.
Сондай-ақ жоба аясында Air–Rail–Auto–Air мультимодальды жүк тасымалдау сызбасын құру және Азия-Тынық мұхиты өңіріне бағытталған көлік-логистикалық маршруттардың тоғысқан тұстарында жаңа экономикалық өсім нүктелерін қалыптастыру көзделуде.
«Президент Қасым-Жомарт Тоқаев көлік-логистика саласын Қазақстан экономикасы құрылымын әртараптандыру жөніндегі ауқымды жұмыстың басым бағыттарының бірі ретінде айқындады. Жетісу облысында заманауи әуежай салу жобасын іске асыру инфрақұрылымды дамытуға елеулі серпін беріп, Қазақстанның Қытай, Орталық Азия және Еуропа арасындағы транзиттік хаб ретіндегі рөлін нығайтады», – деп атап өтті Премьер-Министр Олжас Бектенов.
Өз кезегінде, SKYHANSA компаниясының директорлар кеңесінің мүшесі және тең құрылтайшысы доктор Кристин Грётцбах жобаның мақсаты тек авиациялық инфрақұрылымды дамыту ғана емес, сондай-ақ өңірде заманауи логистикалық және іскерлік орталық қалыптастыру екенін атап өтті.
«Біз жай ғана әуежай емес, халықаралық деңгейдегі дамыған инфрақұрылымы бар көпфункционалды өңірлік хаб құрып жатырмыз. Оның құрамына жүк және жолаушылар терминалдары, жанармай құю кешені, әуе кемелеріне техникалық қызмет көрсету орталығы (MRO), бизнес-орталық, мультимодальды логистикалық мүмкіндіктерге арналған қонақ үйлер кіреді. Оның Қытай шекарасына жақын орналасуы және «Хоргос – Шығыс қақпасы» АЭА аумағында салынуы халықаралық сауданы дамыту үшін ерекше жағдайлар жасайды. Теміржол және автожол желілеріне қосылуы оны Жаңа Жібек жолындағы ең перспективалы логистикалық тораптардың біріне айналдырады», – деді Кристин Грётцбах.
Кездесу қорытындысы бойынша ҚР Көлік министрлігі мен SKYHANSA компаниясы арасында инвестициялық келісімге қол қойылды. Құжатқа сәйкес, инвестор қажетті авиациялық инфрақұрылымды салуды, негізінен отандық материалдар мен қызметтерді пайдалануды, сондай-ақ жобаны іске асыруға тартылатын қызметкерлердің кемінде 90%-ын Қазақстан азаматтары қатарынан қамтуды міндеттенеді. Қазақстан тарапынан инженерлік және көлік инфрақұрылымы жүргізіліп, арнайы экономикалық аймақ қатысушысының жеңілдіктері ұсынылады.
Анықтама үшін: Жоба Қазақстан-Германия бірлескен SKYHANSA кәсіпорнының қатысуымен іске асырылуда. Германия тарапынан жобаның серіктесі — авиациялық терминалдар мен инфрақұрылымды дамытуға маманданған The Hansa Consortium компаниясы. Қазақстан тарапынан — әуежайларға кешенді қызмет көрсету және инжинирингтік шешімдер ұсынатын SKYMAX TECHNOLOGIES компаниялар тобы, ол Қазақстан, Орталық Азия және Кавказ нарығында жұмыс істейді.
